DOMODOSSOLA- 12-02-2024-- Carneval l’è rivascià inca stan e la gent l'è cuntenta da tiras fora un moment da sti rob brut come tucc i ann.

Tra guer miseria, e un po’ da tutt us sa mia da che part ciapà e indora la gent la cerca da truvà qualcosa at bel da pensà.

Ul sior sindich Lucio Pizzi la dacc i ciau al Togn e la Cia, insci in lor i padron at la Cità.

Mi ca sun un po’ vegiat, iò vis ul prim Carnuval pusè che vutanta agn fa.

Indora la pulenta e sciriuii la davan a gratis, parchè la pagavan i sciuri da Dom par bontà.

La povra gent la fava diversi gir su la sculeta e la matin i saltavan la culaziun par fags al post a la pulenta in tul panciun, ca l' era insci voi,

che se ghera mia i bratell i scapavan giù i calzun.

Ul Togn, camisa rusà, cu stava ala Mota l’era ul prim a riva lì e u fava almeno quatar gir su la scaleta

e poi u nava dent al Bar Culumb che ac davan un quartin senza pagà in tul cantun.

Lui l'era cuntent cuma un ratt e l'era ul prim a bata i man al Cavalier cu fava sul palco un bel discors.

A la giubiascia u nava sut ul portich dul Galet a balà, parchè u ghera da mangià e beva a vuluntà.

Adess i robb in cambià parchè ognun u paga la so part.

però la tradizion l'è rispetà cuma tucc i agn, speruma da truvas inca un aut agn!